- 025 -
1517 (14. sierpnia) Buda, w piątek po św. Wawrzyńcu Męczenniku etc.
Król Ludwik JagiellończykLudwik II. Jagiellończyk, syn Władysława II. Jagiellończyka, król Czech (jako Ludwik I.), Węgier i Chorwacji w l. 1516 – 1526. poleca książętom i stanom Śląska zjednoczyć się w sprawie lżejszej i mniejszej monety.
— Wir Ludwig von gots gnaden zu Hungern Behem etc. kunigkh marggraff in Merhern und hertzog in Schlesien etc. embietten den hochwirdigen hochgebornen unsern fuersten ohaimen und allen stenden unsers fuerstenthuembs Schlesien unsern lieben getreuen unser kunigklich gnad und alles guets. Lieben getrewen. Uns wirt mermals vorgetragen die beschwerung der muntz daselbst bei euch in Schlesien, wie sie vast zu ungleich und an ainem ort anders dann an dem andern genommen und gehalten wirt. Und ab die wol von unserm liebsten vatter herrn Wladislao zu Hungern Behem etc. kunigkh saliger gedachtnus mit aller eur verwilligung auffgericht, demnach das die an ainem ort als am andern nicht bestandt noch zu gleiche wirde haben will, sunder mit beschwerung unser ane mittel underthane unserer lieben getrewen [in] unsern kuniglichen stetten underschaidenlicher weise gebraucht und vorhalten wirt zu sunderm nachtail derselbigen, der anligen wir zu genugen underricht sein und forder das nicht lenger zuzesehen oder erleiden gedengken. Gebieten euch darumb ernstlich und wollen, dieweil diese yetzige muntz gemainigklichen an allen ortten klage hat, das sie nach gelegenhait der zeit unsern unterthanen dem armuet zu schwer sein will, das ir euch alle auff den nagsten zusamenkomende Michaelis ainer geringern und leichtern muntz euch vertraget, namblich das anstadt der yetzigen acht heller zwelff geringer heller und ain grosch derselbigen haller zwelf gelten und newn tail groschen und das zehende tail haller in unserm als euers herrn und kunigks namen und gebrech an ainem orte geschlagen uns an allen stellen mit kauffen verkauffen zinsraichung speiskauff und gesindlon, namblich achtundvierzig groschen oder schilling haller vor ain marg, gegeben und genommen werden, und von einander nicht ziehet, ir habt den vorhin euch des mitainander vertragen und guettlichen verainiget. Und ob das nicht geschech, das uns nit lieb wer, so wollen wir als der obrist fuerst in Slesien nicht mer den verderb unser underthanen zesehen, die unsern mit ainer kunigklichen bequemere und leichtere muntz, des wir inen gnadiglichen zugesagt, versorgen und dieselbigen von mennigklich ungewaigert zu nehmen gebietten und also wollen in Slesien gehalten haben. Das maynen wir ernstlichen bey schwerer unser ungnad vermeidung.
Geben in unser stadt Oven am Freitag nach Laurentii des hailigen marterers tag Anno etc. xvij, regnorum autem nostrorum Hungarie et Bohemie anno secundo.
Ex commissione propria
regie maiestatis.